झापा । 

अन्तर्राष्ट्रिय झापाली समाजले भोटेकोशी बाढी पीडितहरुको राहतका लागि १५ लाख रुपैयाँ सरकारलाई हस्तान्तरण गरेको छ । अन्तर्राष्ट्रिय झापाली समाजका अध्यक्ष महेन्द्रप्रसाद चम्लागाँईको नेतृत्वमा रहेको टिमले सोमवार सरकारका अर्थमन्त्री स्वर्णिम वाग्लेलाई मन्त्रालयमा पुगेर उक्त रकमको चेक हस्तान्तरण गरेको हो । 

भदौ १० गते भोटेकोशीमा आएको बाढीको महाविपत्तिमा ठूलो जनधनको क्षति भएपछि राष्ट्रिय संकटको घडीमा विश्वका विभिन्न मुलुकमा रहेका झापालीहरुकातर्फबाट सरकारलाई सहयोग गरिएको अध्यक्ष चम्लागाँईले बताए । अर्थमन्त्री वाग्लेले अन्तर्राष्ट्रिय झापाली समाजको योगदानको प्रशंसा गर्दै धन्यवाद ज्ञापन गरे ।

अन्तर्राष्ट्रिय झापाली समाजका तर्फबाट अध्यक्ष चम्लागाँईसहित संस्थापक अध्यक्ष, संरक्षक एवम् गैरआवासीय नेपाली संघका उपाध्यक्ष दिनेश पोखरेल, अन्तर्राष्ट्रिय झापाली समाजका पूर्वअध्यक्ष तथा संरक्षक मुकुन्द ढुंगाना, झापा ३ का संघीय सांसद प्रकाश पाठक, अन्तर्राष्ट्रिय झापाली समाज नेपाल समन्वय समितिका संयोजक राजु थापा, झापाली समाज अमेरिकाबाट डिल्ली थापा, झापाली समाज अष्ट्रेलियाबाट मदन धौराली तथा प्रेम चौलागाँई लगायतको सहभागिता थियो ।

उक्त अवसरमा झापाली समाज अष्ट्रेलियाको तर्फबाट ११ हजार ४ सय ६१ अष्ट्रेलियन डलर समेत हस्तान्तरण गरियो । मुलुकमा आइपर्ने विपत्तिमा अन्तर्राष्ट्रिय झापाली समाजले यसअघि पनि महत्वपूर्ण सहयोग र सहकार्य गर्दै आएको छ । नेपालीहरुमाथिको पीडामा आफूहरु पनि साथै रहेको अनुभूति दिलाउन हरेक विपत्तिमा सहयोग गर्दै आएको समाजका महासचिव चिरन खवासले बताए ।