हल्दीवारी । 

झापाको हल्दीवारी गाउँपालिकाले भारी वर्षा हुनसक्ने सम्भावनालाई मध्यनजर गर्दै गाउँपालिका क्षेत्रभित्र हुन सक्ने बाढी, डुबान, कटान, पहिरो तथा अन्य सम्भावित विपद्का जोखिम न्यूनीकरणका लागि आवश्यक पूर्वतयारी, सतर्कता, उद्धार तथा प्रतिकार्य व्यवस्थापनका विषयमा छलफल गरेको छ । 

पालिकाले मौसम पूर्वानुमान महाशाखाले जारी गरेको विशेष मौसम बुलेटिनमा उल्लेख भए अनुसार २०८३ असोज ८ गते विहिवारदेखि ११ गतेसम्म कोशी प्रदेशसहित विभिन्न स्थानमा मेघगर्जन, चट्याङ, हावाहुरीसहित भारी वर्षा हुनसक्ने सम्भावनालाई मध्यनजर गर्दै गाउँपालिका क्षेत्रभित्र हुन सक्ने बाढी, डुबान, कटान, पहिरो तथा अन्य सम्भावित विपद्का जोखिम न्यूनीकरणका लागि आवश्यक पूर्वतयारी, सतर्कता, उद्धार तथा प्रतिकार्य व्यवस्थापनका विषयमा छलफल गरेको हो । 

बैठकमा गाउँपालिका  कार्यवहाक अध्यक्ष देवीबहादुर थापा, उपाध्यक्ष लक्ष्मीदेवी मैनालीसहित कार्यपालिका सदस्यहरू, राजनीतिक दलका प्रमुख तथा प्रतिनिधिहरू, गाउँपालिका क्षेत्रभित्रका तीनवटै प्रहरी चौकीका इन्चार्ज, दुवै रेडक्रस उपशाखाका प्रतिनिधि, गाउँपालिकाका कर्मचारी तथा सञ्चारकर्मीहरूको सहभागिता रहेको थियो। 

सम्भावित विपद्को जोखिमलाई समयमै पहिचान गरी जनधनको क्षति न्यूनीकरण गर्न सबै सरोकारवाला निकायबीच समन्वय, सूचना आदान–प्रदान तथा पूर्वतयारीलाई प्रभावकारी बनाउन आवश्यक देखिएकाले निम्न १० बुँदे निर्णय गरिएको पालकाका योजना शाखा प्रमुख राजन न्यौपाले जानकारी दिए ।  

यस्ता निर्णयहरू:

१) हल्दीबारी गाउँपालिका क्षेत्रभित्र भारी वर्षा, बाढी, डुबान, कटान, पहिरो तथा अन्य सम्भावित विपद्का जोखिममा रहेका स्थानहरूको पहिचान गरी सम्बन्धित वडा, प्रहरी, रेडक्रस तथा सरोकारवाला निकायबीच निरन्तर समन्वय र सूचना आदान–प्रदान गर्ने।

२) सम्भावित विपद्को पूर्वतयारीस्वरूप गाउँपालिकाको एम्बुलेन्स, जेसीभी, सवारी साधन, उद्धार सामग्री तथा अन्य आवश्यक उपकरणहरू तयारी अवस्थामा राखी चालक तथा सम्बन्धित कर्मचारीको सम्पर्क विवरण अद्यावधिक राख्ने र आवश्यक पर्दा तत्काल परिचालन हुने व्यवस्था मिलाउने।

३) नदी, खोला, डुबान तथा कटानको जोखिम भएका क्षेत्रका नागरिकलाई विशेष सतर्क रहन, जोखिमयुक्त स्थानमा आवतजावत नगर्न तथा जोखिमको अवस्था देखिएमा तत्काल सुरक्षित स्थानमा जान आवश्यक सूचना तथा सचेतना प्रवाह गर्ने।

४) विपद्को समयमा ज्येष्ठ नागरिक, महिला, बालबालिका, अपाङ्गता भएका व्यक्ति, गर्भवती, दीर्घरोगी तथा अन्य जोखिममा रहेका व्यक्तिहरूको सुरक्षामा विशेष ध्यान दिने र आवश्यक परेमा तत्काल उद्धार तथा सुरक्षित स्थानमा स्थानान्तरण गर्ने।

५) कुनै विपद् वा जोखिमको अवस्था देखिएमा तुरुन्त नजिकको प्रहरी चौकी, वडा अध्यक्षरजनप्रतिनिधि वा गाउँपालिकामा जानकारी गराउने र प्राप्त सूचनाका आधारमा तत्काल आवश्यक उद्धार तथा सुरक्षा कार्य अघि बढाउने।

६) तीनवटै प्रहरी चौकी, दुवै रेडक्रस उपशाखा, वडा कार्यालय, राजनीतिक दल, सञ्चारकर्मी तथा गाउँपालिकाबीच निरन्तर समन्वय कायम गरी विपद्को समयमा उद्धार, राहत तथा सूचना प्रवाहलाई प्रभावकारी बनाउने।

७।)मौसम पूर्वानुमान महाशाखा, जिल्ला प्रशासन कार्यालय, सुरक्षा निकाय तथा अन्य आधिकारिक निकायबाट प्राप्त पूर्वसूचना नियमित रूपमा लिई सोहीअनुसार आवश्यक सतर्कता तथा पूर्वतयारी गर्ने र अपुष्ट सूचना तथा अफवाहको पछि नलाग्न नागरिकलाई सचेत गराउने।

८) सम्भावित विपद्को अवस्थामा रातको समयमा समेत तत्काल उद्धार तथा राहत कार्य सञ्चालन गर्न सक्ने गरी जनप्रतिनिधि, कर्मचारी, प्रहरी, रेडक्रस तथा स्वयंसेवकहरूको सम्पर्क तथा परिचालन व्यवस्था चुस्त राख्ने।

९) विपद्को अवस्था उत्पन्न भएमा जनधनको क्षति न्यूनीकरणलाई प्राथमिकता दिई उपलब्ध स्रोत, साधन तथा जनशक्तिको समन्वयात्मक रूपमा तत्काल परिचालन गर्ने र आवश्यकताअनुसार सम्बन्धित जिल्ला तथा प्रदेशस्तरीय निकायसँग समन्वय गर्ने।

१०) सम्भावित विपद्को अवधिभर सम्बन्धित शाखा, वडा कार्यालय तथा सुरक्षा निकायले आ–आफ्नो क्षेत्रमा विशेष निगरानी राखी जोखिमको अवस्था तथा आवश्यक सहयोगबारे गाउँपालिकालाई तत्काल जानकारी गराउने।