धुलाबारी । 

काँकरभिट्टा स्थित होटल हिकोला हेरिटेज भएको पाँच तला सुविधा सम्पन्न घर होटल सञ्चालकले हडप्न खोजेको घरधनि विष्णुमाया श्रेष्ठ दाहालले आरोप लगाएकी छन् । सोमबार धुलाबारी स्थित मेची उद्योग बाणिज्य संघले आयोजना गरेको पत्रकार सम्मेलनमा होटल हिकोला हेरिटेजका घरधनि विष्णुमाया श्रेष्ठले होटल सञ्चालक देवीभक्त श्रेष्ठलाई सो आरोप लगाएकी हुन् ।

२०७४ पुस २४ गते होटल सञ्चालनका लागि बिर्तामोड निवासी देबीभक्त श्रेष्ठलाई घरधनि मेचीनगर–६, काँकरभिट्टा निवासी श्रेष्ठ र उनका पति पशुपति दाहालले १५ वर्षका लागि मासिक दुई लाख २५ हजार भाडा लिने गरी सम्झौता गरिएको थियो ।

सम्झौता अनुसार होटल सञ्चालकले घरधनिलाई ५ लाख पेश्की दिएको देखिन्छ । उक्त पेश्की मासिक भाडामा काटिदै जाने उल्लेख छ । यसअघि सो होटल घरधनिले सञ्चालन गरिरहेका थिए । त्यहाँ भएका सबै सामान पछि होटल सञ्चालन गरिरहेका देवीभक्त श्रेष्ठलाई छाडिएको थियो । १५ वर्षपछि होटल जसरी चलिरहेको थियो त्यसरी नै छाड्नु पर्नेछ ।

अपुरो घरलाई मर्मत गर्दा लागेको होटल सञ्चालकको खर्चलाई घरधनिले व्यहोर्ने सहमति भएको छ । बार्षिक २/२ वर्षमा ५ प्रतिशतले भाडा बढ्ने सहमति भएको थियो । उक्त सम्झौतामा घरधनिलाई दोस्रो पक्ष र होटल सञ्चालकलाई पहिलो पक्ष भनिएको थियो । त्यतिखेर सम्झौता गर्दा घरधनिलाई दोस्रो पक्ष र होटल सञ्चालकलाई पहिलो पक्ष राखेर गरिएको सम्झौता ठिक नभएको भन्दै घरधनिले आपत्ति जनाएका थिए । त्यहिँबाट दुई पक्षबीच विवाद सुरु भएको हो ।

त्यसपछि घरधनिलाई चित्त नबुझेपछि मेची उद्योग बाणिज्य संघमा पहिलो पटक २०७५ फागुन २२ गते वैठक बसेको थियो । सो वैठकले संघका तत्कालिनका अध्यक्ष विजय डालमियाको संयोजकत्वमा डिल्लीराम घिमिरे, रविचन्द्र नेपाल, माधव अर्याल राम तामाङ, राजु दाहाल र सुरेन्द्र बुढाथाकीको समिति बनिएको थियो ।

समितिले २०७५ चैत २५ गते, २०७६ बैशाख १३ गते, जेठ २४ र ३० गते, कात्तिक ४ गते, २०७६ मंसिर १ गतेको वैठकले होटल सञ्चालकको खर्च यकिन गर्न विज्ञ खटाउने र कोभिड–१९ मा भएको भाडाका विषयमा छलफल गर्ने सहमति भएको थियो । २०७९ असोज २४ गते घरधनिले होटल सञ्चालकले भाडा नदिएको भन्दै मेचीनगर–६ नम्बर वडा कार्यालयमा छलफल गरी घरखाली गरी पाउँ भनि निवेदन दिएका थिए ।

त्यस्तै घरधनिले २०८० बैशाख २९ गते मेची उद्योग बाणिज्य संघमा यसअघिका सम्झौता भंग गरी घरखाली गरी पाउँ भनि निवेदन दिएका थिए । त्यसपछिका अध्यक्ष खेमराज प्रसाई संयोजकत्वमा पुरानै समिति यथावत थिए । समितिको १६ पटकको छलफलपछि २०८० असार २ गते १३ औँ वैठकको निर्णय होटल सञ्चालकले अस्वीकार गरेपछि मुद्वा जिल्ला प्रशासन कार्यालय झापामा पुगेको थियो ।

प्रशासनले मुद्वा मिलाउन समितिलाई पठाएको थियो । त्यसपछि समितिको २०८० असोजमा बसेको वैठकले होटल सञ्चालकलाई घर मर्मत गरे वापत एक करोड ६० लाख, कोभिडको ७ महिनाको घरभाडा छुट घरधनिले तिर्नु पर्ने निर्णय भएको थियो ।

त्यस्तै होटल सञ्चालकले घर छाड्नु परे एकवर्ष अगाडि जानकारी गराउनु पर्ने र त्यस वापतको एक वर्षको घरभाडा होटल सञ्चालकलाई छुट गर्नु पर्ने निर्णय भएको थियो । उक्त निर्णय दुवै पक्षले सहमति जनाएका छन् । उक्त निर्णयको सहमति गरेको भोलि पल्ट होटलको ४ वटा एसी, कुर्सी लगायतका केहि महत्वपूर्ण सामान होटल सञ्चालकले घर लगेको घरधनिले समितिलाई उजुरी गरेको थियो । घरधनिले घरखाली गर्ने सूचना २०७९ असोज २४ गते जानकारी गराएको थियो ।

घरधनिले मेचीनगर नगरपालिकाको न्यायिक समितिमा २०८० माघ २२ गते फेरि घरखाली गराइपाउँ भनी निवेदन दर्ता गरेको थियो । नगरपालिकाले सो विषयमा छलफल गर्न २ पटक बोलाउँदा समेत होटल सञ्चालक आएनन् । नगरपालिकाले २०८० माघ २४ गते पनि होटल सञ्चालकलाई बोलाउँदा नआएपछि स्थानीयबासीले दलबलसहित घरधनिलाई होटलमा पसाएका थिए ।

त्यसपछि २०८० माघ २६ गते नगरप्रमुख गोपाल चन्द्र बुढाथोकी र उपप्रमुख मीना पोखरेल उप्रेतीको उपस्थितिमा छलफल गरी बाणिज्य संघका अध्यक्ष प्रसाईको संयोजकत्वमा डिल्लीराम घिमिरे, माधव अर्याल, न्यायिक समितिका सदस्य कुन्दन निरौला र होटल व्यवसायी मानबहादुर गिरी सदस्य रहने गरी समिति गठन गरिएको थियो । सोही दिन राति होटल दुवै पक्षको सहमतिमा ताला लगाइएको थियो ।

समितिले माघ २८ गते ताला खोलेर छानविन गरिरहेको अवस्थामा होटलमा यसअघि बसेको गेष्टका विषयमा होटल सञ्चालक देवीभक्तका छोरा गौरव श्रेष्ठसँग सामान्य विवाद भएको थियो । गेष्टको सामान होटलमा छुटेको थियो । उक्त सामान प्रहरी, होटल सञ्चालकलाई जानकारी गराएर बाणिज्य संघका अध्यक्ष प्रसाईले सुरक्षित राखेका थिए । भोलि पल्ट गेष्टलाई सामान दिइएको थियो ।

गेष्टको होटलमा पाँच हजार ९ सय बाँकी रहेको भन्दै होटल सञ्चालक श्रेष्ठले समितिसँग निहुँ खोजेका थिए । श्रेष्ठले समितिका सदस्य मानबहादुर गिरीलाई अपशव्द बोल्दै निहुँ खोजेर भिडियो गरेपछि अध्यक्ष प्रसाईले मोवाइल खोसेर फालेका थिए ।

सोही विषयमा सोमबार संघले पत्रकार सम्मेलन गरेको थियो । पत्रकार सम्मेलनमा समितिका संयोजक प्रसाई, पूर्व संयोजक विजय डालमिया, समितिका सदस्य माधव अर्याल, डिल्लीराम घिमिरे, घरधनि श्रेष्ठले लगायतले आ–आफ्नो धारणा राखेका थिए । समितिले एक महिनाभित्र छानविन गरी निर्णय गर्ने गरी कारवाही अघि बढाएको छ ।