झापा । 

नेपाल वैदेशिक रोजगार व्यवसायी संघसहित प्रमुख राजनीतिक दल निकट वैदेशिक रोजगार व्यवसायीका संस्थाहरूले वैदेशिक रोजगारीमा जाने कामदारको स्वास्थ्य परीक्षण शुल्क बढाउनु अव्यहारिक भएको भन्दै फिर्ता लिन माग गरेका छन् ।  स्वास्थ्य व्यवसायीहरूले गत बुधबारदेखि साबिकको स्वास्थ्य परीक्षण युएईको हकमा  ४ हजार ५ सयमा दुई गुणाभन्दा बढ़ि बृद्धि गरी ९ हजार  ५ सय र अन्य मुलुकको हकमा ६ हजार ५ सयमा ३ हजार थप गरेर ९ हजार ५ सय रुपैयाँ कायम गरेका छन् ।

नेपाल स्वास्थ्य व्यवसायी महासंघ, नेपाल मेडिकल व्यवसायी संघलगायतका स्वास्थ्य व्यवसायीका संस्थाहरूले स्वास्थ्य परीक्षणको क्षेत्र बढेका कारण स्वास्थ्य परीक्षणको गुणस्तर कायम राख्न शुल्क वृद्धि गर्नु बाध्यता भएको बताइरहेका छन् । तर, नेपाल वैदेशिक रोजगार व्यवसायी संघसहित प्रमुख राजनीतिक दल निकट वैदेशिक रोजगार व्यवसायीका संस्थाहरूले बढाइएको शुल्कले विपन्न अवस्थामा रहेका कामदारमाथि आर्थिकभार थपेको टिप्पणी गर्दै पुरानै शुल्कमा स्वास्थ्य परीक्षण गर्नुपर्ने माग गरेका छन् । 

संघसहित नेपाल लोकतान्त्रिक वैदेशिक रोजगार व्यवसायी एसोसिएसन, प्रगतिशील वैदेशिक रोजगार व्यवसायी मञ्च नेपाल, नेपाल वैदेशिक रोजगार व्यवसायी गणतान्त्रिक मञ्च, वैदेशिक रोजगार युवा व्यवसायी संघलगायतले बिहीबार छुट्टाछुट्टै विज्ञप्ति जारी गरेर शुल्क वृद्धि फिर्ताको माग गरेका छन् ।

व्यवसायीहरूको छाता संस्था संघका अध्यक्ष भुवनसिंह गुरुङले वैदेशिक रोजगारमा जाने कामदारको स्वास्थ्य परीक्षणको शुल्क वृद्धिको विषय संघको सरोकारको विषय भन्दै छलफल र जानकारी बिना लागू हुन नसक्ने बताएका छन् । उनले नयाँ शुल्क कुनै हालतमा स्वीकार गर्ने अवस्थामा संघ र व्यवसायी नरहेकाले पुरानै शुल्कमा स्वास्थ्य परीक्षण गरिनुपर्ने बताए । 

नेपाल लोकतान्त्रिक वैदेशिक रोजगार व्यवसायी एसोसिएसनले अन्तरिम सरकारले प्रतिनिधि सभाको चुनावको तयारीमा ध्यान केन्द्रित गरेको र श्रम मन्त्रालय छुट्टै विभागीय मातहत नभई प्रधानमन्त्री मातहत रहेको अवस्थाको फाइदा उठाएर स्वास्थ्य परीक्षण शुल्क बढाउने काम भएको जनाएको छ । संघका प्रथम उपाध्यक्ष सुजितकुमार श्रेष्ठले स्वास्थ्य परीक्षणको शुल्क वृद्धिको विषयमा बिहीबार आफूले गृहमन्त्री ओमप्रकाश अर्याललाई भेटेर जानकारी गराएको र आइतबार बिहान संघको प्रतिनिधिमण्डलले सामूहिक रूपमा भेटेर छलफल गर्ने तयारी रहेको बताएका छन् ।

श्रम, रोजगार तथा सामाजिक सुरक्षा मन्त्रालयले वैदेशिक रोजगारमा जाने कामदारको स्वास्थ्य परीक्षण गर्न १ सय ७१ वटा स्वास्थ्य संस्थालाई सूचीकरण गरेको करिब एक सातापछि स्वास्थ्य व्यवसायीहरूले साबिकको स्वास्थ्य परीक्षण शुल्क ९ हजार ५ सय रुपैयाँ कायम गरेका थिए ।

उनीहरूले मन्त्रालयले जारी गरेको स्वास्थ्य संस्था सूचीकरण, नवीकरण तथा अनुगमन सम्बन्धी कार्यविधि, २०७२ को छैटौं संशोधन २०८१ मा हेपाटाइटिस बी र सी, मलेरिया, सुगर, टाइफाइड, रक्त परीक्षण गर्दा सीबीसी, इएसआर, प्लेटलेट, क्षयरोग परीक्षण गर्दा छातीको भिडियो एक्स–रे, मांसपेशी र हड्डीका समस्या, क्यान्सर, मधुमेह, मुटुरोग, म्यान्टोक्स परीक्षण, स्पुटम एएफबी, मिर्गौला परीक्षण गर्दा सिरम युरिया, क्रियाटिनिन श्वासप्रश्वास, छालाका रोगसमेत ३४ प्रकारका रोगको परीक्षण गर्नुपर्ने प्रावधान कायम गरिएकाले शुल्क बढाउनु रहर नभई बाध्यता भएको बताएका छन् । तर वैदेशिक रोजगार व्यवसायीहरूले सम्पूर्ण शरीर जाँच ‘होलबडी चेक’ गर्दासमेत हाल ८ हजार ५ सय रुपैयाँले पुग्ने दाबी गरेका छन् ।

नेपाल मेडिकल व्यवसायी संघका महासचिव कृष्णप्रसाद बजगाईंले यसअघि १९ वटा परीक्षणको ६ हजार ५ सय रुपैयाँ शुल्क रहेकोमा नयाँ कार्यविधिअनुसार ३४ वटा परीक्षण गर्नुपर्ने अवस्थामा शुल्क बढेको नभई घटेको दाबी गर्दै गुणस्तरीय स्वास्थ्य परीक्षणमा सबै पक्षको जोड हुनुपर्ने बताए ।