झापा ।
बिर्तामोड उद्योग वाणिज्य संघअन्तर्गत सञ्चालनमा रहेको व्यवसायी सदस्य राहत कोषलाई अग्रवाल दम्पतीले बैवाहिक वर्षगाँठको अवसर पारेर आर्थिक सहयोग प्रदान गरेका छन्।

संघका पूर्व अध्यक्ष बेदप्रकाश अग्रवाल र सन्तोषदेवी अग्रवालले आफ्नो बैवाहिक वर्षगाँठको अवसरमा कोषका लागि २१ हजार रुपैयाँ सहयोग गरेका हुन्। उक्त रकम संघका अध्यक्ष राजु न्यौपाने, राहत कोष संयोजक राजकुमार घिमिरे ९राजु०, विशिष्ट सदस्य निर्मल भट्टराई तथा उद्योग उपाध्यक्ष विशाल थापालाई हस्तान्तरण गरिएको थियो।

व्यवसायी सदस्यहरूलाई आपत्कालीन अवस्थामा सहयोग गर्ने उद्देश्यले स्थापना गरिएको राहत कोषलाई आगामी दिनमा एक करोड रुपैयाँ पुर्‍याउने लक्ष्य राखिएको संघले जनाएको छ। हालसम्म कोषमा २५ लाख रुपैयाँभन्दा बढी रकम संकलन भइसकेको छ।

बिर्तामोड क्षेत्रका उद्योगी, व्यवसायी तथा विभिन्न सामाजिक व्यक्तित्वहरूले आफ्नो जन्मदिन, वैवाहिक वर्षगाँठलगायत व्यक्तिगत अवसर पारेर कोषमा सहयोग गर्दै आएका छन्। कोषमा सहयोग गर्ने दाताको उल्लेख्य सहभागिता रहँदै आएको संघले जनाएको छ।

कोषको विस्तारमा योगदान पुर्‍याउने सहयोगीलाई उद्योग वाणिज्य संघले कदरपत्र प्रदान गरी सम्मान गर्ने परम्परा समेत कायम गरिएको छ। व्यवसायीहरूबीच सहकार्य र आपसी सहयोगको भावना मजबुत बनाउन राहत कोष प्रभावकारी माध्यम बन्दै गएको संघको विश्वास छ।