झापा । 

गत असोज महिनामा ७३ हजारभन्दा बढी नेपाली युवायुवती वैदेशिक रोजगारीमा गएका छन् । वैदेशिक रोजगार विभागका अनुसार असोजमा ७३ हजार ७६५ जना वैदेशिक रोजगारीमा गएका छन् । यो संख्या गत वर्षको असोज महिनाको तुलनामा करिब १० हजारले बढी हो । गत वर्ष असोजमा सबै प्रक्रियाबाट ६४ हजार ६३४ जना वैदेशिक रोजगारीमा गएका थिए ।

मुलुकमा आन्तरिक रोजगारी सिर्जना गरी युवा जनशक्तिलाई स्वदेशमै राख्ने र बाध्यताले वैदेशिक रोजगारीमा गएकाहरूलाई फर्काउने वर्तमान सरकारले पटकपटक प्रतिबद्धता जनाएको भए पनि वैदेशिक रोजगारमाथिको निर्भरतामा कमी नआएको तथ्यांकले देखाएको छ । असोजमा व्यक्तिगत श्रम स्वीकृतिमा १० हजार ८४४ जना, रिइन्ट्रीबाट ३० हजार २०६ जना, जिटुजीका माध्यमबाट १ हजार ३ जना र वैधानिकीकरणका माध्यमबाट ११० जना गएका छन् ।

असोजमा म्यानपावर कम्पनी र व्यक्तिगत प्रक्रियाबाट गरी ४३ हजार ५५९ जना गएका छन् । म्यानपावर कम्पनीमार्फत ३१ हजार ६०३ जना गएका छन् । अघिल्ला महिनाहरूमा जस्तै असोजमा पनि युएई जाने क्रम अग्रस्थानमा रहेको छ । असोजमा २३ हजार ८९९ जना युएई गएकोमा म्यानपावर कम्पनीमार्फत १४ हजार ४९४ जना गएका छन् ।

त्यसैगरी, मलेसियामा ६ हजार ३६, कतारमा ३ हजार ६१९, कुवेतमा २ हजार ६०७, साउदी अरेबियामा २ हजार ५१२, साइप्रसमा ६९३, ओमानमा ६२९, बहराइनमा ४८६, जापानमा ३०७, जोर्डनमा १०८, मौरिससमा ६७, श्रीलंकामा २१, टर्कीमा ११, माल्दिभ्समा १० र हङकङमा २ जना गएका छन् ।

८१ वटा म्यानपावरले एकसय वढी कामदार विदेश पठाए 

असोज महिनामा ८१ वटा म्यानपावर कम्पनीले एक सय वढी कामदार वैदेशिक रोजगारका लागि विदेश पठाएका छन् । जसमध्ये प्याराडाइज इन्टरनेसनल प्रालि ५७८ जनालाई वैदेशिक रोजगारीमा पठाएर धेरै कामदार पठाउने म्यानपावर कम्पनीको सूचीको शीर्ष स्थानमा रहेको छ ।

त्यसैगरी अल स्किल इन्टरनेसनल ह्युमन रिसोर्स प्रालि ५२५ जना पठाएर दोस्रो र मोभिरा रिक्रुटमेन्ट कन्सल्ट्यान्ट्स सर्भिस भर्ती प्रालि ३४० जना पठाएर सूचीको तेस्रो स्थानमा रहेका छन् । असोजमा ८ दर्जनभन्दा बढी म्यानपावर कम्पनीले न्यूनतम एक सय र त्यसभन्दा धेरै कामदार पठाएका छन् ।