मेचीनगर ।

झापाको मेचीनगरमा जारी २१ औं झापा जिल्ला स्तरीय अन्तर विद्यालय छात्र, छात्रा क्रिकेट प्रतियोगिताको आज भएको खेलमा छात्रतर्फ गंगा मेमोरियल स्कूल र छात्रातर्फ अरुणोदय अंग्रेजी मावि विजयी भएका छन् ।

मिलन क्रिकेट क्लबको आयोजनामा तुर्केनी खेलमैदानमा आज भएको पहिलो खेलमा छात्रतर्फ तारापुञ्जलाई १२ रनले पराजित गर्दै गंगा मेमोरियल स्कूल विजयी भएको छ । टस जितेर ब्याटिङ्ग रोज्दै तारापुञ्जगंगा मेमोरियलले ११९ रन जोडेको थियो । १२० रनको लक्ष्य लिएर मैदान प्रवेश गरेको तारापुञ्जले १०८ रन मात्रै जोड्न सक्यो । खेलको प्लेयर अफ द म्याच ३ विकेट लिँदै १७ रन जोड्ने विजेता टिमका प्रशान्त तामाङ्ग घोषित भए ।

त्यस्तै आज नै भएको छात्रा तर्फको खेलमा अरुणोदय अंग्रेजी माविले गंगा मेमोरियल स्कूललाई ४३ रनले पराजित गरेको छ । टस जितेर पहिले व्याटिङ्ग रोजेको अरुणोदय ८४ रन जोडेको थियो । ८५ रनको तार्केट लिएर मैदान उत्रेको गंगा मेमोरियलले ४१ रन मात्रै जोड्न सक्यो । खेलको प्लेयर अफ द म्याच २६ रन जोड्दैं टिमलाई विजयी बनाउने दुर्गा राई घोषित भइन् ।

प्रतियोगितामा भोलिको खेल बिहान १०ः३० बजे तारापुञ्ज अंग्रेजी मावि र धुलाबारी मावि छात्रातर्फ खेल खेल्नेछन् भने, छात्रतर्फ बालकल्याण मावि र धुलाबारी मावि बिच हुने आयोजक मिलन क्रिकेट क्लबका अध्यक्ष बिरु श्रेष्ठले जानकारी दिए ।

फागुन १६ गतेसम्म सञ्चालन हुने प्रतियोगिताको बिजेता तथा उपबिजेताले क्रमश नगद २० हजार र १० हजारसहित ट्रफी, मेडल र प्रमाण पत्र प्राप्त गर्नेछन् । प्रतियोगितामा म्यान अफ द म्याच, म्यान अफ द सिरिज, उत्कृष्ट बलर, उत्कृष्ट ब्याट्सम्यान, उत्कृष्ट किप्पर र उत्कृष्ट क्याचका रुपमा खेलाडी छनोट गरी अवार्ड प्रदान गरिने आयोजकले जनाएको छ ।