भद्रपुर  l

आगामी फागुन २१ गते हुने प्रतिनिधिसभा सदस्यको निर्वाचनका लागि झापा निर्वाचन क्षेत्र नम्बर ३ मा राजनीतिक सरगर्मी बढ्दै गएको छ ।

राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले प्रतिनिधिसभा सदस्यका लागि उम्मेदवारी दर्ता गराएसँगै यो क्षेत्र पुनः उच्च प्रोफाइलको प्रतिस्पर्धातर्फ उन्मुख भएको छ ।

झापा निर्वाचन क्षेत्र नम्बर ३ बाट राष्ट्रिय प्रजातन्त्र पार्टीका अध्यक्ष लिङ्देनले प्रतिनिधिसभा सदस्यका लागि औपचारिक रूपमा उम्मेदवारी दर्ता गराएका छन् । भद्रपुरस्थित मुख्य निर्वाचन अधिकृतको कार्यालय पुगेर उनले मुख्य निर्वाचन अघिकृत उमेश प्रसाद लुइँटेल समक्ष मनोनयन पत्र दर्ता गराएका हुन् ।

उम्मेदवारी दर्तापछि सञ्चारकर्मीसँग संक्षिप्त प्रतिक्रिया दिँदै लिङ्देनले झापा–३ का जनताको विश्वास र समर्थनकै आधारमा आफू पुनः मैदानमा उत्रिएको बताए । उनले सुशासन, राष्ट्रिय स्वाभिमान र जनजीविकासँग जोडिएका मुद्दालाई प्राथमिकतामा राखेर चुनावी अभियान अघि बढाइने उल्लेख गरे ।

लिङ्देन झापा–३ बाट यसअघि पनि निर्वाचित भइसकेका नेता हुन् । उनी हाल राष्ट्रिय प्रजातन्त्र पार्टीको अध्यक्षका रूपमा सक्रिय रहँदै आएका छन् । उनको उम्मेदवारीसँगै झापा–३ मा राप्रपाले फेरि बलियो दाबी प्रस्तुत गरेको राजनीतिक विश्लेषकहरूको भनाइ छ ।

स्थानीय स्तरमा लिङ्देनको संगठनात्मक पकड र राष्ट्रिय राजनीतिमा उनको भूमिकाका कारण यो क्षेत्रलाई प्रतिस्पर्धी निर्वाचन क्षेत्रका रूपमा हेरिएको छ । अन्य प्रमुख दलका उम्मेदवारहरू पनि मैदानमा उत्रिसकेकाले झापा–३ मा बहुपक्षीय प्रतिस्पर्धा हुने संकेत देखिएको छ ।

मनोनयन दर्ता कार्यक्रमका क्रममा राप्रपाका नेता–कार्यकर्ता तथा समर्थकको उल्लेख्य उपस्थिति देखिएको थियो । उनीहरूले लिङ्देनको पक्षमा नाराबाजी गर्दै चुनावी अभियानको सुरुवात गरेका छन् ।

मनोनयन दर्ता प्रक्रिया पूरा भएसँगै अब झापा–३ मा औपचारिक रूपमा चुनावी प्रचारप्रसारले गति लिने अपेक्षा गरिएको छ ।

अध्यक्ष लिङ्देनले यस अघि दुई पटक नेपाली कांग्रेसका नेता कृष्णप्रसाद सिटौलालाई पराजीत गरेका थिए ।

नेकपा एमालेसंगको समिकरणका कारण नेपाली कांग्रेसका नेता सिटौलालाई सहजै पराजीत गरेका लिङ्देन यो पटक एक्लै चुनावी मैदानमा छन् ।

नेपाली कांग्रेसले राजेन्द्र घिमिरेलाई यो क्षेत्रबाट चुनावी प्रतिष्पर्धामा उतारेको छ । त्यस्तै राष्ट्रिय स्वतन्त्र पार्टीले कार्यवहाक सभापति प्रकाश पाठकलाई चुनावी मैदानमा उतारेको छ ।

यता नेपका एमालेका तर्फबाट संविधान सभा सदस्य हरि वहादुर राजवंशीले प्रतिष्पर्धा गर्दैछन् । जसका कारण पनि यो निर्वाचन क्षेत्रमा चुनाली माहोल थप रोकच बन्ने देखिएको छ ।