आरती राजवंशीको परिवारलाई ढडुवा युवा क्लब अभियानको साथ

हल्दीबारी ।

झापाको हल्दीबारी गाउँपालिका–२ पाराखोपीमा घटेको एक हृदयविदारक घटनाले सम्पूर्ण समुदायलाई स्तब्ध बनाएको छ। स्थानीय प्रेमलाल राजवंशीकी १७ वर्षीया छोरी आरती राजवंशीको घरमै सुतिरहेको अवस्थामा आँपको रुख ढल्दा दुःखद् निधन भएको थियो। एकाएक आएको प्राकृतिक विपत्तिले एउटा उज्यालो भविष्य बोकेकी किशोरीलाई सधैंका लागि खोसेर लगेको छ।

दिवंगत आरती हल्दीबारी माध्यमिक विद्यालयमा कक्षा १० मा अध्ययनरत थिइन्। यस वर्षको एसईई परीक्षाको तयारीमा जुटेकी उनी मेहनती, अनुशासित र सपना बोकेकी छात्राका रूपमा चिनिन्थिन्। तर नियतिको निर्दयी खेलले उनको जीवन यात्रालाई अकालमै टुंग्याइदियो।

यस पीडादायी क्षणमा ढडुवा युवा क्लबले देखाएको सक्रियता र मानवीयता साँचिकै प्रशंसनीय बनेको छ। घटना भएको २४ घण्टा नबित्दै क्लबले नगद १५,५५५ रुपैयाँसहित विभिन्न संघ–संस्था र व्यक्तिहरूबाट संकलित सहयोग पीडित परिवारलाई हस्तान्तरण गर्दै दुःखमा साथ दिएको छ।

यसै अभियानलाई निरन्तरता दिँदै आज थप ४०,३३० रुपैयाँ संकलन गरी हस्तान्तरण गरिएको छ। यससँगै हालसम्म कुल ५५,८८५ रुपैयाँ सहयोग पीडित परिवारलाई प्रदान गरिएको ढडुवा युवा क्लबले जनाएको छ। संकटको समयमा देखिएको यस्तो तत्परता नै साँचो मानवताको परिचय हो।

यसै क्रममा चिल्ड्रेन गार्डेन अङ्ग्रेजी माध्यमिक विद्यालय परिवारले पनि हृदयदेखि नै सहयोगको हात अघि बढाएको छ। विद्यालयले कुल १७,२४५ रुपैयाँ सहयोग प्रदान गरेको छ, जसमा पूर्व विद्यार्थीहरूको तर्फबाट ६,००५ रुपैयाँ, शिक्षक–शिक्षिकाहरूको तर्फबाट ८,१०५ रुपैयाँ र विद्यार्थीहरूको तर्फबाट ३,१३५ रुपैयाँ संकलन गरी हस्तान्तरण गरिएको छ। सानो–सानो योगदानले ठूलो सहारा दिन सक्छ भन्ने सन्देश यस कार्यले स्पष्ट पारेको छ।

ढडुवा युवा क्लबका सचिव अभिषेक खतिवडाले विभिन्न क्षेत्रका सहयोगी मनहरूलाई क्लबमार्फत अभियानमा जोडिन अपिल गर्दै पीडित परिवारलाई साथ दिन आग्रह गरेका छन्। उनका अनुसार, “यस्तो विपत्तिमा सबैको साथ र सहकार्य नै पीडित परिवारका लागि सबैभन्दा ठूलो बल हो।”

पछिल्लो समय ढडुवा युवा क्लबले समाजमा सकारात्मक परिवर्तन ल्याउने उद्देश्यका साथ परोपकारी तथा रचनात्मक गतिविधिहरूमा निरन्तर सक्रियता देखाउँदै आएको छ। यस घटनामा देखाएको मानवीय संवेदनशीलता र शीघ्र पहलले क्लबप्रति समुदायको विश्वास अझै बलियो बनेको छ।

मानवता भनेको केवल शब्दमा सीमित रहने कुरा होइन, कठिन परिस्थितिमा एकअर्काको दुःखमा साथ दिने व्यवहार हो भन्ने ज्वलन्त उदाहरण यस अभियानले प्रस्तुत गरेको छ। आरतीको असमयिक निधनले सिर्जिएको पीडामा मल्हम बन्न खोज्ने यस्ता प्रयासहरूले समाज अझै जीवित, संवेदनशील र एकताबद्ध रहेको सन्देश दिन्छन्।

हाम्रो बारेमा

हाम्रो समूह

सम्पर्क